حمزہ شینواری کا خط بنام سید انیس جیلانی

 لنڈیکوتل 

9.6.73۔   

پیارے مجذوب

شکر ہے،آپ کا خط ملا ،کل ہی رائس صاحب کو لکھا تھا کہ مجذوب کا خط نہیں آرہا ،خدا کرے کوئی تکلیف تو نہیں انہیں ۔

بھائی میرا سفرنامہ حج طاہر بخاری نے ترجمہ کرنا شروع کیا تھا مگر ابھی تک اس میں معتدبہ کام نہ کرسکا میں خود کرتا تو اب کبھی کا ختم ہو جاتا ۔

ہاں آپ ہمیشہ یہی لکھا کرتے ہیں کہ میں بابا خان اور ولی خان سے مل کر انہیں رائے دوں کہ وہ بھٹو صاحب سے مصالحت کرلیں ،سو یہ بڑی بات ہوگی مگر اب معاملہ بہت دور جا چکا ہے اب تو متحدہ محاذ کے لیڈروں پر بندوقوں پستولوں کے علاوہ بم بھی پھینکیں جارہے ہیں آپ کا حکم سرآنکھوں پر میں باچا خان اور ولی خان سے مل کر کہوں گا مگر آپ بھی ایک کام کیجئے اور وہ یہ کہ آپ جماعت اسلامی ،پی ڈی پی ،تحریک استقلال اور متحدہ مسلم لیگ کے لیڈروں سے استدعا کریں کہ وہ صدر بھٹو سے مصالحت کریں کیا خیال ہے ؟ 

عجیب معاملہ ہے کہ آپ جیسے معاملہ فہم بھی آج تک فرنگی کے اس پروپیگنڈہ سے متاثر ہیں ،آپ کیا بلکہ تقریباً آدھا پاکستان کہ غفار خان اور ولی خان ہندؤں کے ایجنٹ ہیں اور وہ پاکستان کو ختم کرادینا چاہتے ہیں لیکن اب جب کہ دوسری پارٹیوں نے بھی ولی خان سے اتحاد کرلیا تو اب کیا خیال ہے کیا دوسرے لیڈر بھی ایجنٹ بن گئے ؟ آپ اس امر کا استصواب " میر صاحب" ( زاہد حسین ) سے کرایئے ان کا اب کیا خیال ہے ؟ ولی خان بچارے نے تو اسلامی نظام قبول کیا پختونستان کا نعرہ بھی ترک کردیا ،حتی کہ اپنی حکومت میں پختونوں کے شدید مطالبہ کے باوجود نصاب تعلیم کو پرائمری تک بھی شامل نہیں کیا جس پر ہم سب ادیب و شاعر ان سے ناراض ہوگئے کیونکہ یہ ہمارا حق تھا ۔

آج کل میں پشتو میں ایک کتاب " سنائے انسانی اور حصول علم " پر کتاب لکھ رہا ہوں ،چوتھا باب لکھا جارہاہے چونکہ اکثر معدے کی شکایت لاحق ہوا کرتی ہے اس لئے زیادہ نہیں لکھ سکتا ۔ہاں ۔اس کتاب کے ساتھ ہی ساتھ ایک مقالہ " اسلام اور قومیت " بھی پہلے پشتو میں لکھا اور پھر اردو میں ترجمہ کیا 8 فل سکیپ صفحوں پر پھیلا ہوا ہے چونکہ یہ مقالہ صرف اپنی یاداشت سے لکھا گیا ہے اور اس کےلئے کوئی تیاری نہیں کی گئی تھی اس لئے میرا خیال ہے کہ بشرط فرصت اس پر ایک کتاب ہی لکھ لوں تاکہ برادران وطن کو معلوم ہو جائے کہ اسلام نہ صرف یہ کہ قومیت کو بڑی اہمیت دی ہے بلکہ اس کی نفی کرنے کو کفر بتایا ہے اور یہ جو کہا جاتا ہے کہ پاکستان میں صرف ایک ہی قوم بستی ہے اور وہ مسلمان قوم ہے یہ بڑی قوموں کے استحصال کا ایک ہتھیار ہے جس میں چند علما بھی ان کے ہم خیال ہیں ۔

 آپ نے پوچھا ہے کہ پاکستان کا ان ہنگاموں کے باوجود بچ رہنا ممکن نہیں ،میں اس کا جواب دے سکتا ہوں حالات بظاہر ایسے ہیں کہ ملک کے ٹکڑے ٹکڑے ہونے کا خطرہ ہے تیس صاحب نے میرا وہ خط آپ کو نہیں بھیجا جس میں میں نے قابل میں قادر بخش نظامانی سے بات چیت کا حوالہ دیا تھا ،اور جنرل جیلانی کے مقدمہ میں محمود علی قصوری نے سرکاری گواہ پر جرح کرتے وقت اس کا ذکر کیا تھا ،چنانچہ نظامانی نے مجھ سے کہا تھا کہ بوگس پاسپورٹ پر کراچی سے بیروت گیا اور وہاں پاکستان کے ختم کرنے کی سازش تیار ہو رہی ہے اور اب اکبر بگٹی کے ایک کام کے لئے کابل آیا ہوں ،اس نے کہا ہمارا ادارہ ہے کہ پنجاب کو بھارت سپرد کردیں اور سندھ بلوچستان اور سرحد کا ایک فیڈریشن بنائیں ۔میں نے کہا آو نیک بخت ،پاکستان نے تمہارا کیا بگاڑا ہے ۔اس نے متعجب ہو کر کہا ۔ایک پختون اور پاکستان کا حامی ۔پاکستان نے تو ہمیں غلام بنانے کے علاوہ اور کچھ کیس ہی نہیں ۔چنانچہ اس ضمن میں میں ان سے کھل کر باتیں ہوئی ۔اگر ولی خان بھی اس سازش میں شریک ہوتے تو وہ ضرور کہہ دیتا ۔اور اکبر بگٹی ولی خان سے ناراض بھی اس لئے ہے کہ ولی خان نے پاکستان کے ختم کرادینے کی حامی نہیں بھری اور تعجب تو یہ ہے کہ اکبر بگٹی کو بھٹو صاحب ہی اپنے ہمراہ روس لے گئے تھے ۔نظامانی نے صاف طور پر تو بھٹو کا نام نہیں لیا مگر اس کی باتوں سے کچھ یوں مسترشح ہورہا تھا کہ دال میں کچھ کالاکالاہے ۔پھر آپ سوچیں ،کہ پرامن جلسوں پر فائرنگ حتی کہ بم پھینکنے کی کاروائیاں ،کئی لیڈروں کا قتل ،اصغر خان پر قاتلانہ حملے ۔کیا اس کا مطلب یہ نہیں کہ متحدہ محاذ کے لوگ بھی تشدد پر اتر آئیں اور پھر باقاعدہ خانہ جنگی شروع ہو جائے ۔کیاآپ صدر بھٹو کے ان تمام غیر جمہوری اقدامات کو صحیح جانتے ہیں ۔خدا کرے صحیح ہوں ۔لیکن بظاہر واقعات اس کی تردید کرتے ہیں البتہ ایک بات میں چند سال قبل سنی تھی ایک وکیل تھی فضل محمود مرحوم ۔ایک زمانے میں گورنر سرحد کے دفتر میں کام کرتے تھے بعد میں ملازمت چھوڑ کر وکالت کرنے لگے ۔اس نے کہا تھا کہ 1933 میں انگلینڈ کی پارلیمنٹ سے ایک گشتی چٹھی ہندوستان بھر کے اعلی افسروں کے نام جاری کی گئی تھی جس کا مضمون یہ تھا کہ اگر ہم ہندوستان کو تقسیم کرنا چاہیں تو کسی طرح تقسیم کرنا ہوگا اور اگر بعد میں پھر متحد کرنا چاہیں تو اس کی صورت کیا ہوگی،چنانچہ یہاں پارلیمنٹ کو جو آراء پہنچیں ،انہیں کے مطابق برصغیر کی تقسیم عمل میں آگئی اور ایک خاص عرصہ کے بعد یہ تقسیم بھی ختم ہونے والی ہے اس لیے جو افسران اس بھید سے واقف ہیں وہ ہر طریقے سے دولت اکٹھی کررہے ہیں ،تاکہ پاکستان کے ختم ہونے کے بعد وہ مزے سے رہیں ،اب خدا جانے مرحوم کا یہ قصہ صحیح ہے یا غلط مگر مرحوم نہایت ہی دیانتدار اور شریف انسان تھے ۔اور اب ہماری آنکھیں حضرت باری کے فضل پر لگی ہوئی ہیں یہ ملک جو اسلام کے نام پر حاصل کیا گیا تھا اگر ختم کردیا جائے تو عالم اسلام کےلئے عموما اور اہل پاکستان کے لیے خصوصاً ایک بہت بڑا المیہ ہوگا پاکستان میں اگرچہ اب تک کوئی ایسی حکومت نہیں آئی جو اسلام کی موئید ہو بلکہ ہر حکومت اسلام کو آہستہ آہستہ ختم ہی کرانا چاہتی ہے مگر یہ امید تو بہر حال تھی کہ کبھی نہ  کبھی کوئی ایسی حکومت بھی برسر اقتدار آہی جائے گی جواسلامی قدروں کا تحفظ کرے گی یہ ملک قائم ہوگا تو خدا ضرور کسی ایسی حکومت کو برسر اقتدار کے آئے گا مگر جب یہ ملک ہی نہ رہے گا تو پھر کیا ہے ،اپنی بلا سے بوم رہے یا بیمار ہے۔

 آپ نے پشتو کی فرمائش کی ہے ۔اس لئے میں اردو رسم الخط میں ایک غزل مع ترجمہ پیش کرتا ہوں اگلے صفحہ پر ملاحظہ فرمائیے۔

                                                        دعاگو

                                                  حمزہ شیواری 

                             چہ د مسکا پہ سخاوت  

                                                                                جب محبوب کے تبسم کی سخاوت پر دامن پھیلائے جاتے تھے

                                                                                اب وہ بھولے بھالے دامن اپنے آپ کو سی لینے کا غم کیوں کرتے ہیں

                                                                                حوادث میں پختون دامن کچے ثابت نہیں ہوئے 

                                                                                کیونکہ وہ غیرت کے دھاگے سے سئے گئے ہیں 

                                                                                قسمت تو دیکھے میرے ہاتھ جتنے کوتاہ ہوتے رہے 

                                                                                اس کے دامن پکڑنے کے لئے اور لمبے ہوتے گئے 

                                                                                جب بہار میں ہر طرف گریبان پھاڑے جارہے تھے 

                                                                                اس ہنگام اگر دامن پھاڑ دیئے گئے تو تعجب کی کیا بات ہے 

                                                                                حسن جتنا دولت مند ہوگا اتنا ہی بخیل بھی ہوگا 

                                                                                ایسے قارون کے در سے دامن ہمیشہ خالی ہی نکلتے ہیں 

                                                                                جس نے جوہر انسانیت کو کم نظر سے دیکھا

                                                                                تو اس سے کیا ہوا اگر آقا کے در میں ان کے دامن بھر کر بھاری ہوگئے 

                                                                                پختون میزبان سے یہ کسی کی توقع ہوسکتی تھی 

                                                                                کہ وہ مہمان دامنوں کو خالی ہی رخصت کردیں گئے 

                                                                                اے حمزہ بجلی کی چمک کے ساتھ ہی آنکھوں کی نظر چلی گئی 

                                                                                جب سے کہ اس کے تبسم کی خیرات کےلئے دامن پھیلائے جاتے ۔